ស្លាប់ ៦នាក់ និង ២០នាក់បាត់ខ្លួនខណៈមានភ្លៀងធ្លាក់ខ្លាំងនៅជប៉ុន​

មានមនុស្ស ៦នាក់បានស្លាប់ និង២០នាក់ទៀតបាត់ខ្លួន ខណៈមានភ្លៀងធ្លាក់ខ្លាំងនៅកោះគ្យូស៊ូ ភាគនិរតីប្រទេសជប៉ុន។
ទីភ្នាក់ងារសារព័ត៌មានចិន ស៊ិនហួ ចេញផ្សាយនៅថ្ងៃព្រហស្បតិ៍ ទី១២ ខែកក្កដា ឆ្នាំ២០១២ នេះថា មនុស្ស៥នាក់បានស្លាប់ និងបាត់ខ្លួន១៩នាក់ ក្នុងទីក្រុង អាស្សូ និង តំបន់ជុំវិញខេត្ត គូម៉ាម៉ូតូ ជាកន្លែងដែលអាចមើលឃើញ ទឹកភ្លៀងធ្លាក់កម្ពស់ពី ១០០ ទៅ១២០មីលីម៉ែត្រ។
ទីក្រុងតាគីតា បុរសម្នាក់បានរកឃើញសាកសពមួយទៀត បន្ទាប់ពីគាត់ធ្លាក់ក្នុងទឹកទន្លេ ជាពេលដែលទីក្រុងនេះកំពុង រៀបចំឲ្យមនុស្សប្រហែលជា ២៥,០០០នាក់ជម្លៀសខ្លួន ចេញពីលំនៅដ្ឋានរបស់ពួកគេដែលនៅជិតទន្លេ។​​
អាជ្ញាធរឧតុនិយមបានព្រមានថា ភ្លៀងធ្លាក់នេះអាចបណ្តាលឲ្យមានទឹកជំនន់ និងផ្ទាំងដីបាក់នៅតាមច្រាំងទន្លេ ភាគខាងលិចប្រទេសជប៉ុន ជាកន្លែងដែលអាចមើលឃើញ ទឹកភ្លៀងធ្លាក់កម្ពស់ ១០០មីលីម៉ែត្រត្រឹមព្រឹកថ្ងៃសុក្រ៕
ព័ត៌មានពីៈ មជ្ឈមណ្ឌលព័ត៌មានដើមអម្ពិល